لاہور: صدر مملکت ڈاکٹر عارف علوی اور خاتون اول بیگم ثمینہ عارف علوی نے پی ٹی آئی چیئرمین عمران خان کی عیادت کے لیے شوکت خانم اسپتال کا دورہ کیا۔
صدر مملکت اور خاتون اول نے نیک تمناؤں کا اظہار کیا اور ان کی جلد صحت یابی کے لیے دعا کی۔ وہ تقریباً تین گھنٹے تک عمران خان کے ساتھ رہے۔
اس موقع پر صدر مملکت نے کہا کہ اللہ تعالیٰ کے فضل و کرم سے پاکستان ایک بڑے بحران سے بچ گیا۔ صدر اور عمران خان نے ملک کی مخدوش سیاسی اور معاشی صورتحال پر بھی تبادلہ خیال کیا۔
صدر نے حکومت سے مطالبہ کیا کہ وہ مجرموں کو انصاف کے کٹہرے میں لانے کے لیے ہر ممکن اقدامات کرے۔ انہوں نے کہا کہ حکومت ہر شہری کے آئینی بنیادی حقوق کے تحفظ کو یقینی بنائے جس میں پرامن اجتماع کا حق، زندگی اور آزادی کی حفاظت اور اظہار رائے کی آزادی کا حق شامل ہے۔
صدر نے اس بات کا اعادہ کیا کہ تمام اسٹیک ہولڈرز کو اپنے سیاسی مقاصد کو آگے بڑھانا چاہیے اور بات چیت، گفت و شنید، مشاورت اور غور و فکر کے جمہوری ذرائع کی حدود میں مسائل کا حل تلاش کرنا چاہیے۔ صدر نے ایک بار پھر اہم مسائل پر اتفاق رائے پیدا کرنے کے لیے اسٹیک ہولڈرز کے درمیان ثالثی کے لیے اپنی ذاتی حیثیت میں اپنی خدمات پیش کیں۔
